जय राजा कालीवीर
जय गुग्गे दा बजीर
जय-जय कालीवीर
सांई 52 वीरें दा
सहाई साध-फकीरें दा
मालक धनालें दे सीरें दा
योद्धा तीरें-श्मशीरें दा
काले घोड़े दा सवार
हत्थ लेदी तलवार
शाम सौली नौहार
गल चिट्टड़े ने हार
सील बैंत दा जाया
जप जोग कमाया
कष्ट रोग नठाया
मन कश्मीर जुद्धया च काया
तन तेरी माया
जय राजा कालीवीर
जय गुग्गे दा बजीर
मुनि-गुणी जोगी ऐ
मास-पत्त दा भोगी ऐ
पूजा परजोगी ऐ
देवता संजोगी ऐ
अदूनाथ दा चेला
तेरा थान तेरा बेल्ला
तन मारू मरेला
तेरा सांभ संगेला
पैन गुग्गड़ी दा वीर
छिक्कै पिंजनी मारै तीर
मंडलीकैं दा ऐ बजीर
सुट्टै फट देवै चीर
कौल दा धनी
कुत्थै थान कुत्थै बनी
गल बासक मनी
शोभा तेरी घनी
हिंदुएं दा खालक ऐ
गौ-ब्राहमण दा पालक ऐ
माता तेरी कालक ऐ
तूं सच्चा औदा बालक ऐ
जय राजा कालीवीर
जय गुग्गे दा बजीर
पैन गुग्गड़ी दी मन्न
नीले ताजिये दी मन्न
अठें तपियें गी मन्न
नौमें शिवें तपियें गी मन्न
सुर्ग ओं तां सुर्गा फिरो
प्याल ओं तां प्याला फिरो
देस ओं तां देसा फिरो
परदेस ओं तां परदेसा फिरो
मंडिये दी लाज रखो
चेले दी भलैई रक्खो
भक्तें दी भक्ती चेता रक्खो
बच्चड़े दी सच्चाई मन रक्खो
सीसां हस्सो मुखां बोलो
अमरत बोलो बादशाह जी
सिद्धी पायो राह जी
अपनी देओ थाह जी
जय राजा कालीवीर
जय गुग्गे दा बजीर
करों सारें दी भलाई
आखै तुकी कालका माई
जय माता मल्ल रानिए
अंबे सिंह भवानिए
माता देविएं दी रानी
माता रानिएं दी महारानी
पुक्खे गी भोजन
त्र्याएं गी पानी
औतरां दे घर ऐंसेआ दे
जय माता मल्ल रानिए
तेरी साम तेरी साम
सुर्ग ओ तां सुर्गा फिरो
प्याल ओ तां प्याला फिरो
मंडियै दी लाज रक्खो
चेलै दी भलैई रक्खो
भगतिए दी भगती चेतै करो
देसा फिरो परदेसा फिरो
प्रगटो प्रगटो आओ बाहर
अपनी ओंद करो जाहर
सीसें हस्सो मुखा बोलो
अमरत बोलो बादशाह जी
श्री महावीर जी श्री कालीवीर जी
ठंडी चौलो पौन जी
बगाओ निर्बल सीर जी
नाथै टौलियै दी दुहाई ऐ
गंग देवक दी दुहाई ऐ
जय बीर जय कालीवीर
बीरें दा बीर कालीवीर
काले झुंडे काली शमशीर
साधे दा डंडा मुशटंडे दा पीर
जय जय मल्ल रानी
जय जय कालीवीर।
